KALIBO, Aklan—Ginaeauman nga mabutang eon ro bilog nga probinsya it Aklan sa mas manaba nga quarantine classification kasunod it pagtapos sa Setyembre 7, 2021 sa modified enhanced community quarantine.
Sa ginpatigayon nga pueong it Provincial Inter-Agency Task Force (IATF) kahapon, September 5, 2021, ginreport ni Dr. Cornelio Cuachon, Jr. It Aklan Provincial Health Office (PHO) nga haeos tanan nga mga lokal nga gobyerno sa probinsya hay nakaangkon it pagnaba it kaso it mga tinamaan it covid-19 halin ko buean it Hulyo hasta ko Setyembre 4, 2021.
Kapin sa napueo ka mga LGU’s ro natumod nga una sa low-risk classification ag ro nabilin nga pitong iba pang banwa hay una sa moderate risk.
Samtang ro probinsya it Aklan hay na-categorize sa low-risk quarantine classification.
Suno mat-a kay Dr. Leslie Ann Luces, nataeopangdan man ro pagnaba it mga pasyente nga naadmit sa provincial hospital hasta ko Setyembre 4, 2021.
Sa makaron hay 25% eon lang it COVID wards ag ICU beds ro presenteng gina-okupahan sa ospital.
Bangud sa raya nga improvements, posibleng igabutang it National IATF sa mas manaba nga quarantine classification ro bilog nga probinsya ag magapaguwa man sigon it executive order si Aklan Governor Florencio Mirflores engkaso nga may pagbag-o sa mga border restrictions nga presenteng ginapatuman it gobyerno probinsyal.
Gin-insister man it gobernador nga kinahang-ean pokusan ro COVID-19 vaccination agud nga maabot ro herd immunity sa target nga Nobyembre 2021.
