KALIBO, Aklan—Sangka mini mall concert ro ginpahaum it Aklan Police Provincial Office ukon APPO para sa publiko bilang kaparte it selebrasyon it Valentine’s Day sa maabot nga Pebrero 14 sa sangka mall sa Roxas Avenue Extension.
Suno kay P/Cpl. Leonilyn Artes , public information officer it APPO nga magatukar ro APPO band nga ginaeakipan it mga miyembro it kapulisan bandang alas-10 sa agahon ag alas-2 man sa hapon.
Bukas sigon raya sa publiko kun sa siin gina engganyo ro tanan eabi eon ro mga magpamilya ag magkarelasyon agud nga mabatyagan nanda nga espesyal sanda sa nasambit nga adlaw.
Mag-eowas sa libreng concert hay may ginpahaum man ro mga kapulisan nga mga igapanupod nga bueak, balloons ag iba pang items nga korteng tagipusuon.
Sa pihak nga parte, gindugang pa ni Cpl. Artes nga hugut nga seguridad ro igapatuman it APPO sa mga strategic nga lugar kun sa siin 24/7 nga nakabantay ro kapulisan sa mga lugar nga kaeabanan nga ginadayo it publiko kada Valentines Day.
