KALIBO, Aklan — Kadungan it pagsueod it ‘ber months’, nagpadumdum ro Aklan Police Provincial Office (APPO) kontra sa mga petty crimes ag nagkaeain-eain nga scam online rason nga indi basta-basta nga magkumpiyansa.
Suno kay PSSgt. Leonilyn Artes, assistant information officer it Aklan PPO nga sa makarondaya nga paniempo hay naga abu man ro mga maeain nga elemento nga nagapanipueos sa sitwasyon.
Kadungan kara, anang ginpasiguro nga nagapabilin nga naka-alerto ro mga pulis kontra sa mga snatcher, holdaper, salisi gang ag iba pang pasaway sa sosyudad eabi eon sa mga mall ag iba pang matawong lugar.
Gindugang pa ni Artes nga kaeabanan nga nagataas ro crime incidents kada holiday season rason nga mas pa nanda nga pagapabaskugon ro police visibility agud nga mapugngan ro anumang criminal acivities.
Gin engganyo man nana ro publiko nga magbuylog ag makipagbueuligan sa mga otoridad para mapabilin nga eowas.
Indi man sigon magduha-duha nga magpangayo it bulig sa kapulisan ukon magtawag sa Emergency 911 bangud sa ginapatuman nga 5 minutes response it kapulisan.
Mag-eowas sa ginabantayan nga mga petty crimes nga ginaeauman nga magataas makaron nga ber months, padayun man nanda nga ginatutukan ro angot sa illegal gambling ag illegal nga droga.
