KALIBO, Aklan—Medyu nabugnutan it mabahoe nga tunok si Aklan Provincial Director P/Col. Crisaleo Tolentino matapos nga ipahayag ro anang parte sa ginpatigayon nga pagpamati it senate committee on public order.
Sa pihak kara, nagapabilin suno kana ro anang pagkabaeaka bangud nga posibleng magapaguwa eon man it himo-himo nga istorya ro kampo ni Pamplona Mayor ag biyuda ni Gov. Roel Degamo nga si Janice Degamo.
Ginpahayag ni Col. Tolentino nga nakaginhawa imaw it haeuga ag nagaeaum nga malimpyuhan eon ro anang pangaean.
Bangud sa isyu suno kana hay nadaeahig pati ro anang pamilya.
Nagapati man imaw nga puro fabricated ro mga akusasyon kontra kana bangud nga kon may kamatuoran hay mabuhay eon kunta sigon imaw nga nakasuhan.
Dugang pa nga na-promote pa sigon imaw nga full-pledge Colonel ko tiempo it Duterte administration.
Madumduman nga nagbuhi it mga mabug-at nga akusasyon si Mayor Degamo kontra kay Col. Tolentino sa hearing it senado angot sa Degamo slay case.
Sambilog kara ro pag angot kana ag sa anang asawang si dating councilor Ma. Victoria Luz Montesa Tolentino sa pagkamatay ni Bongbong Divinagracia ag sa pagbihag kay Police Executive Master Sergeant Reuel Piñero.
