KALIBO, Aklan—Padayun nga gina-imbestigahan it Aklan Police Provincial Office ukon APPO ro daywang owa pa makilaea nga mga scammer matapos nga gingamit ro pangaean ni OIC Aklan police provincial director P/Col. Victorino Romanillos Jr.
Modus operandi sigon it mga suspek nga magpangayo it sponsorship ukon bulig pinansiyal sa pilang mga establisimento komersiyal sa banwa it Kalibo gamit ro pangaean ni Col. Romanillos, kun sa siin ro kantidad hay pagagamiton sigon sa mga event it PNP.
Suno kay P/Corporal Leonilyn Artes, public information officer it APPO nga raya hay owa it kamatuoran.
Sa mayad nga swerte suno kana ag nakipag-angot anay ro mga negosyante sa taeatapan it provincial director agud nga makumpirma ro pag-solicit kanda it kwarta.
Sa ginpatigayon nga pag-usisa sa mga naunang insidente it pagpangloko, natumod nga ro mga scammers hay owa naghalin sa Aklan kundi sa Laguna pinaagi sa mga cellphone numbers nga gingamit sa andang operasyon.
Ginpahayag dugang nga bukon eon it bag-o ro makarondaya nga kalakaran bangud nga kada sigon may bag-ong pungko nga OIC provincial director hay nagahueag man ro mga scammers agud nga makahuthot it kwarta sa andang mga target nga negosyante.
Kaparehong pattern sigon ro ginagamit sa pinaka-ulihing insidente.
Angot kara, nagpaandam ro APPO sa publiko nga maging alerto ag indi basta-basta nga magpati agud nga indi maloko.
