KALIBO, Aklan—Nagpaandam ro Aklan Police Provincial Office ukon APPO makaron nga nagahilapit ro Paskwa sa uman nga pagkalhit it mga kawatan ag iba pang mga manugloko.
Suno kay P/Capt Aubrey Ayon, tagapaghambae it APPO nga dapat eon nga maging madahan makaron nga nagapasueod ro tiempo it Paskwa ag nagiging aktibo eon man ro mga nagkaeain-eain nga grupo kapareho it Salisi Gang, Budol Budol ag iba pa.
Ginabantayan sigon it mga kriminal ro mga naga-agto sa mga mall ag iba pang mga matawong lugar.
Dugang pa nga ginatutukan man it kapulisan ro mga tourist destination kapareho it isla it Boracay.
Bangud kara, kaibahan sa andang security plan ro pag deploy it mga pulis sa mga national highways kamana man ro pag-intensify sa pagtukod it mga checkpoints ag pagpatrolya sa mga ginakabig nga places of convergence kaibahan ro nagkaeain-eain nga mga terminal.
Kaibahan man nga ginapahauman it APPO sa mga makarondaya nga paniempo hay ro pagpatigayon it opening of lights it nagkaeain-eain nga banwa sa aklan nga ginasundan it pagpatigayon it tradisyunal nga simbang gabi rason nga may andang ginahimo nga augmentation ag security coverage .
Samtang, ginpamalibaran man ni Capt Ayon nga may naga operate nga organisadong grupo ukon sindikato it manakaw sa Aklan.
