KALIBO, Aklan—Ginkaalarma it Aklan Police Provincial Office ro uman nga pagkalhit it mga peke nga kwarta kon sa siin ro masaming nabiktima kara hay ro mga magueang.
Bangud kara, ginpahayag ni PSSgt. Leonilyn Artes, tagapaghambae it Aklan PPO nga insigida sanda nga naghimo it aksyon sa pinaagi it pagpaandam sa publiko ag gin-engganyo ro mga raya nga insigidang ireport sa pinakamaeapit nga taeatapan it pulisya engkasong mabiktima sanda it mga manugloko.
Inde suno kana pag-itolerar it pulisya ro makabig ngara nga petty crimes nga nagadistorbo ag nagatao it hassle sa pangabuhian it mga tawong nagapangabuhi it disente.
Gina-engganyo man nanda ro publiko nga maging alerto ag mapang-usisa kapin eon ro mga vendor sa andang ginabaton nga kwarta.
Ginpahayag dugang ni Artes nga nagaguwa ro mga estratehiya it mga manugloko kapin eon kon masako ro andang pagabiktimahon.
Madumduman nga maabo ro nagpahayag it andang pagkadismaya matapos nga mabiktima it peke nga tig-sang libo nga denomination it kwarta.
