KALIBO, Aklan — Ginpamalibaran it Aklan Police Provincial Office (APPO) ro gina-alegar nga naispatan nga private armed group sa banwa it Buruanga antes ro pag-umpisa it 2025 midterm elections.
Suno kay P/Capt. Aubrey Ayon, spokesperson it Aklan PPO nga nauna eon nga ginklaru it hepe it Buruanga Municipal Police Station nga naging negatibo ro andang imbestigasyon ag owa man sigon sanda it naabutan nga mga armadong kaeaeakin-an nga ginasugid nga naka-full battle gear pa.
Sa pihak kara, nagaeaum sanda nga magapabilin nga maayos ag malinong ro eleksyon sa nasambit nga banwa.
Ro anuman suno kana nga ginapaabot nga report sa mga awtoridad hay insigida nga gina-aksyunan ag gina-imbestigahan.
Samtang, sa masobra sa 1,000 nga mga awtoridad nga naka-deploy makaron nga National and Local Elections sa Aklan, 700 kara hay mga PNP personnel ag ro nabilin hay mga katapo it Philippine Army, Bureau of Fire Protection ag Philippine Coast Guard nga nagatuyo nga masiguro ro kaeowasan ag seguridad it ginapatigayon nga eleksyon.
Apang ginpasiguro ni Ayon nga maga-provide sanda it dugang nga security kon kinahangeanon, kun sa siin haum sanda nga mag-deploy it quick reaction team.
Nagapabilin suno kana ro Aklan sa idaeum it green status category maskin nga ro bilog nga Western Visayas hay ginbutang sa red category.
Sa kada polling centers sa probinsiya nga may una nga kabilugan nga 331, may nakabantay kara nga daywang pulis nga naga-akto bilang body-body system.
