KALIBO, Aklan—Ginpasiguro it Aklan Police Provincial Office (APPO) nga magasunod sanda sa direktiba it bag-ong PNP Chief ag Regional Director para maangkon ro katawhayan ag kaayusan sa nagahilapit nga 2022 national and local elections.
Suno kay Police Lieutenant Colonel Bernard Ufano it APPO, raya makaron ro prayoridad it tanan nga mga estasyon it pulisya sa bilog nga nasyon.
Ginmando sigon kanda ro pag-review sa mga hitabo ko nagtaliwan nga mga eleksyon para raya hay ma-preparahan ag malikawan ro kaparehong insidente.
Mag-eowas kara, hugut man ro andang monitoring sa mga aktibong private armed groups nga masami nga ginagamit kada tyempo it eleksyon.
Ginpadumdum man ro mga pulis nga maging neutral ag non-partisan.
Sa makaron, gina-plantsa eon ro pagsaylo sa area of assignment it mga pulis nga may mga kapamilya nga magapadaeagan sa nagahilapit nga eleksyon.
Madumduman nga pormal eon nga ginbayluhan ni Police Brigadier General Flynn Dongbo si Police Brigadier General Rolando Miranda nga nagretiro sa serbisyo ko Nobyembre 16.
Si Dongbo nga tubong La Trinidad, Benguet hay dating hepe it Integrity Monitoring and Enforcement Group.
Pagapadayunon man sigon kara ro mga naumpisahan nga programa ni Miranda angot sa kampanya kontra sa illegal nga droga, kriminalidad, insurhensiya ag pagpahaum sa eleksyon sa masunod nga dag-on.
