KALIBO, Aklan—Haum eon makaron ro bilog nga pwersa it Aklan Police Provincial Office ukon APPO sa pagbantay sa Semana Santa nga maga-umpisa sa Abril 2 hasta 9.
Ginpaabot ni P/SSgt. Jane Vega, assistant public information officer it Aklan PPO nga bangud sa ginaeauman nga pagdagsa it mga biyahero sa mga transport terminal rason nga magabutang ro kada municipal police stations it police assistance desk sa mga bus terminal ag mga pantalan.
Kamana man sa mga pilgrims sites kapareho it Bukid Tigayon ag Manduyog Hills sa banwa it Banga.
Hugut man nga pagabantayan ro mga simbahan ag iba pang lugar nga ginadayo kapareho it isla it Boracay nga ginadagsa it mga local and foreign tourists kada makaron nga paniempo.
Magabutang man it mga road safety marshalls ag traffic personnels sa mga daeanon agud nga magbantay sa daeagan it trapiko.
Pagagamiton man it Aklan PPO ro mga force multipliers nga magabulig sa kapulisan agud nga mapabilin ro peace and order situation.
