KALIBO, Aklan—Nagpadumdum ro Aklan Police Provincial Office ukon APPO sa publiko kon paalin nga maging eowas ro selebrasyon it Valentines Day.
Suno kay P/Cpl. Leonilyn Artes, assistant public information officer it Aklan PPO nga kinahangean nga magdahan sa mga gustong makipag-eye ball sa unang kahigayunan sa andang mga ka-chat ukon textmate eabi eon ro mga pamatan-on.
Agud nga makasigurado suno kana nga makalikaw sa peligro, dapat nga magdaea it chaperone.
Dugang pa kara nga kon mahimo hay likawan ro premarital sex nga kaeabanan nga nagaresulta sa teenage pregnancy.
May mabahoe sigon nga papel ro mga ginikanan sa pag-giya sa andang mga unga rason nga ugalion ro pagbantay sa andang mga aktibidad ag mga nakilaea sa social media.
Samtang, gin abisuhan man ni P/Cpl. Artes ro publiko nga indi magmaneho kon naka-inom it makahieilong nga ilimnon.
Sa mga nagapamakae, dapat man suno kana nga magbantay sa mga kawatan kamana man sa mga ginabaton nga kwarta kapin pa ag nagakalhit makaron ro mga fake money.
Sa pihak nga parte, ginpahayag pa ni Cpl. Artes nga naka-alerto 24/7 ro kapulisan sa mga matawong lugar agud nga mapabilin ro peace and order sa bilog nga probinsiya it aklan sa selebrasyon it Valentines Day.
