KALIBO, Aklan—Nagpaandam sa publiko ro Aklan Police Provincial Office ukon APPO sa pagkalhit it pekeng kwarta partikular sa Kalibo public market.
Raya hay matapos nga sangka negosyante ro nagreklamo sa Kalibo municipal police station matapos nga bayaran it peke nga 1,000 pesos bill.
Mag-eowas sa anang nabaton nga fake money, may iba pang negosyante ro nagresurender it peke nga kwartang nabaton nga naga abot tanan sa 3,000 pesos nga ginaeakipan it daywang tig-1,000 ag daywa man nga tig-500 pesos.
Kadungan kara, ginpadumdum ni P/SSgt. Jane Vega, assistant public information officer it Aklan PPO ro publiko nga kon pwede hay tun-an ro pagkilatis sa kwarta ag maging madahan sa pagbaton eabi eon sa mga oras nga masako bangud nga dikara sigon kaeabanan nga naga atake ro mga manugloko.
