KALIBO, Aklan—Nagpanindugann ro Aklan Police Provincial Office ukon APPO nga indi pagakunsintihon it kapulisan ro anuman nga illegal nga hilimuon.
Suno kay P/SSgt. Jane Vega, assistant public information officer it APPO nga naging hugut ro direktiba ni Aklan police director Police Colonel Crisaleo Tolentino nga mas pang pabaskugon ro kampanya kontra sa illegal gambling.
Gusto sigon kara nga ipabilin nga gambling free ro probinsiya.
Nagpaguwa sigon raya it mandu sa tanan nga mga hepe it municipal police stations nga tapnaon ro mga illegal nga pasugaean.
Ginpasiguro man it APPO nga owa it pagasantuhon sa sin-o man nga madakpan sa illegal gambling operations bilang kaparte raya it anti-criminality campaign.
Ko nagtaliwan nga adlaw hay sangka illegal bookies ro naaresto nga nagapataya it small town lottery ukon STL.
Kadungan kara, gina engganyo nana ro publiko nga kon may nasayuran angot sa illegal gambling operations hay indi magduha-duha nga magdangop sa kapulisan.
