KALIBO, Aklan—Padayon nga nakaalerto ro tanan nga municipal police station sa ginaeauman nga pagbuhos it mga eskursyunista sa mga baybayon ag kasubaan makaron nga kaadlawan it kapyestahan ni San Juan de Bautista.
Suno kay PSSgt. Jane Vega, assistant police information officer it Aklan Police Provincial Office ukon APPO nga mas pang ginhugtan ro paglatag it seguridad ag ginsiguro nanda nga makit-an ro presensya it mga kapulisan eabi eon sa mga matawo nga lugar.
Bukon eamang sigon sanda ro nakaalerto kundi ro mga natungdan pang ahensya partikular ro maritime police ag ro mga disaster risk reduction management personnel.
Angot kara, apela eamang nanda sa publiko nga maging madahan eabi eon sa pagmaneho it maskin anong klaseng saeakyan ag maging responsable sa andang kaugalingon agud nga malikawan ro disgrasya.
