KALIBO, Aklan—Owa it nailistang vote buying sa bilog nga probinsiya it Aklan.
Raya ro ginpahayag ni Aklan PPO spokesperson P/Capt. Aubrey Ayon pagkatapos it ginpatigayon nga pre-deployment briefing.
Sa pihak kara, mas ginpabaskog sigon nanda ro pagtutok makaron bukon eamang sa mga comelec checkpoints kundi maging ro mga posibleng kaso it vote buying hasta sa adlaw it eleksyon sa Lunes, Mayo 12.
Ginpahayag dugang nga may mga espekulasyon sa pilang lugar, apang owa it opisyal nga reklamo nga nabaton ro mga kapulisan angot kara.
Madumduman nga ginlunsar it Commission on Elections ro Committee on “Kontra Bigay”, kun sa siin ginataw-an kara it gahum ro PNP, Armed Forces of the Philippines (AFP), ag National Bureau of Investigation (NBI) nga magpatigayon it surveillance, mag-validate it mga report, ag insigida nga mag-aksyon kontra sa mga naga-eabag sa laye it eleksyon partikular eon sa vote buying.
Samtang, ginpasiguro ni P/Capt. Ayon sa publiko nga haum ro bilog nga linya it Aklan PPO sa pakikipagbueuligan sa iba pang mga ahensya it gobyerno agud nga mapatuman ro kalinong ag masiguro ro tampad, maayos, ag malimpyo nga eleksyon sa Lunes.
