KALIBO, Aklan—Padayun ro monitoring it Aklan Police Provincial Office ukon APPO may kaangtanan sa pilang barangay officials nga gina alegar nga eakot sa illegal drug trade sa Western Visayas.
Raya hay kasunod it pahayag ni PNP chief Gen. Benjamin Acorda Jr., nga naga abot sa 430 nga barangay officials ro ginasugid nga eakot sa iligal nga droga nga ginabantayan makaron it pulisya.
Sa intelligence report nga buyot it PNP, pinakamaabu kara hay naghalin iya sa Region 6 nga may 76 ag National Capital Region nga mga high value individual samtang ro iba hay district levels eamang.
Suno kay PSSgt. Jane Vega, assistant information officer it Aklan PPO nga base sa record it Regional Public Information Office, sambilog ro Aklan nga nakasueod sa listahan.
Posible sigon nga pila sa nasambit nga mga barangay officials hay drug surrenderee, apang maskin nga ginbo-oe eon sa listahan hay padayun nga ginasubaybayan.
Ginpahayag dugang nga limang barangay officials pa sa Western Visayas ro kaibahan sa listahan, apang owa ginmitlang kon siin nga mga probinsiya naghalin ro mga raya.
Gindugang pa ni Vega nga nagaeaum sanda nga owa it taga Aklan nga naeakip sa lima.
Sa pihak nga parte, nagapati ro APPO nga kapareho it mga nagtaliwan nge eleksyon, owa it anuman nga kinagamo nga matabu sa nagahilapit nga barangay ag sangguniang kabataan eleksyon sa Oktubre.
