KALIBO, Aklan—Owa it may na-monitor nga mga local government offiicials sa probinsiya it Aklan nga may security threat ukon paeag sa andang seguridad makaron nga 2023.
Raya ro ginklaru ni P/Staff Sgt. Jane Vega, assistant public information officer it Aklan Police Provincial Office ukon APPO sa media conference kasunod it ginpaguwa nga report nga ro probinsiya eamang it Guimaras ro owa it nabaton nga death threats sa andang mga lokal nga opisyal.
Suno kana nga ro datos nga ginbasehan it Police Regional Office ukon PRO-6 hay ko nagtaliwan nga dag-on pa.
Nasayuran nga gin-umpisahan makaron it PRO-6 nga makipag-istorya sa mga elected nga local government officials agud nga matumod kon may nabaton sanda nga paeag sa kabuhi ag kon sin-o ro nagakinahangean it regular nga security.
Angot kara, ginpasiguro it Akaln PPO nga haum sanda nga magtaeana it police security personnel sa mga lokal nga opisyal nga maga-request kara.
Gindugang pa ni P/Staff Sgt. Vega nga sa makaron hay nagapadayun ro andang threat assessment kun sa siin ginmanduan ro tanan nga mga municipal police stations nga makipag-angot sa andang natungdan nga mga mayors, governors ag miyembro it House of Representatives.
Ro tikang hay matapos ro sunud-sunod nga madugong pag-atake sa mga lokal nga opisyal sa nasyon nga ro pinaka-ulihi sa mga naging biktima hay si Negros Oriental Gov. Roel Degamo.
Sa pihak nga parte, nagapabilin nga hugut ro kampanya it Aklan PPO sa tokhang kontra armas luthang ukon loose firearms.
