KALIBO, Aklan—Ginpabalik it Aklan Provincial Board sa Sangguniang Bayan it Kalibo agud nga kompletuhon ro iba pang mga kinahang-eanon nga dokumento angot sa ginaproponer nga ordinansa nga pag-utang sa Development Bank of the Philippines ukon DBP nga naga abot sa masobra sa P691 milyon.
Suno kay 1st district sangguniang panlalawigan member Nemesio Neron nga kinahang-ean nga ma-estudyuhan it mayad it committee on appropriations ag committee on laws it SP ro ordinance no. 2021-031 it LGU-Kalibo.
Dapat suno kay Neron nga ro pagagastusan it paga-utangon nga kwarta sa DBP hay naeakip sa annual investment plan it munisipyo ko 2020.
Madumduman nga mag-eowas sa planong pagbakae it eugta sa Barangay Andagao, Kalibo nga nagabalor it masobra sa P60 milyon nga pagabutangan it 3 storey nga multi purpose building nga paga obrahon nga relocation site it mga vendors sa Kalibo Public Market hay igataeana man raya sa pagpa-obra it Covid-19 facilities sa 16 nga barangay, drop-in facility for women and children, municipal quarantine facility, motorpool ag iba pa.
Ro planong pagbakae it eugta sa barangay Andagao hay ginkontra it majority it mga sangguniang bayan members maskin nga gin-insister ni mayor Emerson Lachica nga nag agi raya sa tamang proseso.
