KALIBO, Aklan—Ginpasiguro it provincial board nga pagatutukan ro medyu naga-inabu nga pagkamatay it mga indibidwal nga kahimuan it mga riding-in-tandem sa probinsiya it Aklan.
Suno kay 1st district board member Nemesio Neron, chairman it committee on peace and order nga posibleng sa ikatlong domingo it makaron nga buean it Nobyembre pagkatapos it andang budget deliberation hay maumpisahan eon ro andang inquiry angot sa nasambit nga isyu.
Madumduman nga nagdihon it resolusyon si Neron nga nagaduso it inquiry in aid of legislation sa pilang mga unsolved cases it motorcycle riding suspek.
Ginpahayag dugang nga kinahang-ean nga magbueuligan ro tanan agud nga matapna ro riding-in-tandem ag makasuhan ro mga indibidwal ukon grupo nga sa likod kara.
Pinaagi kara hay magaserbi sigon raya nga paandam sa iba.
Aminado man ro opisyal nga mabahoe nga hangkat sa Philippine National Police ro motorcycle riding suspek rason nga dapat gid nga obrahon ro tanan nga pamaagi agud nga maresolba ro mga kaso.
Nasayuran nga mag-eowas sa negosyanteng si ryan relator, panibag-ong biktima it riding in tandem si Marte Dalida it Brgy. Venturanza, Banga ko agahon it Miyerkules nga pinatay sa kilid it karsada sa Brgy. Libas, Banga.
Nakita sa CCTV nga antes ro krimen hay ginasundan ro biktima it daywang owa nakilaea nga mga kaeaeakin-an nga nakasakay sa motorsiklo.
Sa makaron hay nagapadayun ro imbestigasyon ag pagtugis it Banga Municipal Police Station sa insidente.
