KALIBO, Aklan — Nagahueat pa it pormal nga sabat halin sa Department of Public Works and Highways (DPWH) ag Public-Private Partnership Center ro Sangguniang Panlalawigan it Aklan may kaangtanan sa kontrobersyal nga unsolicited proposal para sa Boracay Bridge.
Suno kay Sangguniang Panlalawigan member Reynaldo “Boy” Quimpo nga nagpangayo sanda it mga dokumento ag eksplinasyon angot sa proseso it proposal, bidding, ag negosasyon it proyekto matapos raya nga i-award it DPWH sa San Miguel Holdings Corporation.
Hasta sa makaron hay nagahueat sigon sanda it sabat halin sa nasambit nga mga ahensiya.
Nauna eon nga nagpasa it resolusyon ro provincial board nga nagakondena sa pag-apruba it DPWH sa proyekto kamana man nga hugut raya nga ginakontra it lokal nga gobyerno it Malay, Aklan provincial government ag nagkaeain-eain nga sektor.
Samtang, ginklaru it gobyerno nga owa pa it klaru nga update kun eubusan nga mataw-an it go-signal ro proyekto, samtang padayun nga nagapanayo it detalye ag pagklaru halin sa DPWH.
Ro nasambit nga proyekto, nga sangka unsolicited proposal sa idaeum it PPP scheme, hay nagatuyo nga magpatindog it tulay nga maga-konekta sa isla it Boracay ag mainland Aklan, apang padayun nga gina kwestiyon bangud sa isyu it konsultasyon, environmental impact, ag epekto sa pangabuhian it mga residente.
