KALIBO, Aklan—Ginapahaum eon it Aklan Provincial Government ro nagakaigo nga pondo agud nga itau nga financial assistance sa mga hog raisers nga apektado it African Swine Fever ukon ASF agud nga mabuligan nga uman nga makabangon ro hog industry sa probinsiya.
Suno kay Sangguniang Panlalawigan member Jay Tejada it 2nd district it Aklan nga nakikipag-angot eon ro Provincial Agricutural Office ag Office of the Provincial Veterinarian sa tagsa ka mga Municipal Agricultural Office para sa pagtumod it mga beneficiaries pinaagi sa hugut nga validation para sa igatau nga ayuda.
Kinahangean suno kay board member Tejada nga naka-insured sa Philippine Crop Insurance Corporation ag nagpa-rehistro sa andang natungdan nga munisipyo ro mga hog raisers nga namatayan it alagang baboy kamana man nga ginpaidaeum sa culling ukon boluntaryo nga pagpatay agud nga indi eon magkalhit ro virus.
Antes pa man sigon ro outbreak it ASF sa probinsiya hay ginmandu eon it provincial government ro paglista sa mga kasapatan para sa pag-identify sa matuod-tuod nga recepients it ayuda.
Ro kantidad nga mabaton hay naka depende sigon sa assessment ag validated nga numero it mga apektadong baboy.
Madumduman nga nauna eon nga nagdeklara it state of calamity ro Aklan bangud sa ASF outbreak nga nagatuyo nga magamit ro quick response fund ukon 30% nga gintaeana nga pondo para sa disaster risk reduction.
