KALIBO, Aklan–Ginkalipay it Aklan Provincial Government ro pag-withdraw it ap-at ka mga kongresista sa House Bill 1085 ukon uman nga pagduso it Boracay Island Development Authority (BIDA) Bill sa kongreso.
Ginpahayag ni Aklan Vice Governor Atty. Reynaldo Quimpo nga ginapasaeamatan nanda ro withdrawal nanday Luis Reymund F. Villafuerte, Congressman it 2nd District it Camarines Sur; Cong. Miguel Villafuerte, Congressman it 5th District it Camarines Sur; Tsuyoshi Anthony G. Horibata, Congressman it 1st District it Camarines Sur ag Nicolas C. Enciso VIII, Congressman Representing Bicol Saro Party List.
Ginakalipay sigon nanda ro pagkonsidera it mga natungdan nga kongresista sa posisyon it lokal nga gobyerno it Aklan ag pagpamati sa sentimiyento it mga Aklanon kontra sa BIDA bill.
Plano makaron it gobyerno probinsyal nga magpasa it sangka resolution para i-recall ro pagdeklara sa ap-at nga kongresista bilang persona non grata ag magpasa it resolution nga nagapasaeamat kanda matapos ro ginhimo nga withdrawal.
