KALIBO, Aklan–Maidid nga ginpamalibaran it Aklan Provincial Government nga nakaangkon it pag-eabag sa carrying capacity it isla it Boracay ko nagtaliwan nga Semana Santa.
Suno kay Provincial Administrator Atty. Selwyn Ibarreta nga base sa andang ginabuytan nga record, naga-abot eamang sa haeos 10,000 ro tourists arrival sa Boracay ko Abril 14 samtang masobra 11,000 man ko Abril 15 nga masyadong maeayo sa ginasugid nga masobra 22,000 nga bisita.
Ro nasambit nga datus suno kana hay maghalin sa gin-isyu nga QR code ag resibo nga nakolekta halin sa terminal fee.
Nagpanindugan pa si Atty. Ibarreta nga haum sanda nga atubangon ro igakasa nga imbestigasyon agud nga pamatud-an nga owa it natabo nga pag-eabag.
Posible sigon nga ro datus nga ginbasehan it Department of Tourism (DOT) hay maghalin sa Malay Tourism Office kamana man nga owa ginbawas ro numero it pagguwa nga mga turista.
Ginpahayag dugang nga naga-average gihapon ro Boracay it 4,000 hasta 6,000 nga tourists arrival kada adlaw.
