Kalibo Aklan ————-Ginpasiguro it Aklan Provincial Government nga owa it naging problema ro andang pag-isyu it mga dokumento kapareho it online health declaration card para sa mga turistang gustong magbakasyon sa Isla it Boacay kamana man sa mga Aklanon nga gustong mag-uli sa probinsya.
Suno kay Aklan Provincial Administrator, Atty. Selwyn Ibarreta nga dapat maging maidid eamang ro mga turista sa pag-check it andang mga ginbutang nga impormasyon ag siguraduhon nga tama raya agud nga indi maka-eksperyensiya it aberya.
Nasayuran nga ro mga travelers nga gustong magpadueong sa probinsya hay kinahangean eamang nga magfill-up it online health declaration card sa aklan.gov.ph nga website samtang ro mga turista man nga magabisita sa Boracay hay sa tourist Boracay.
Kung accepted eun ro andang application hay gina-asistiran sigon ro mga raya agud nga makasumite it mga requirements.
Samtang pag-abot man sa vaccination certificate hay ginpahayag ni Atty. Ibarreta nga puwedi eamang nga magpakita it vaccination card bilang pamatuod nga fully vaccinated eun raya kontra COVID-19.
Apang dapat nga ro vaccination card hay may QR code.
Kung owa it QR code hay mas manami nga magpangayo eun lang it certification sa kung siin nagpabakuna agud masiguro nga ro nasambitan nga papeles hay bukon it peke.
Samtang ro mga 12 anyos panaba man nga gustong magbakasyon sa Boracay ukon mag-uli sa probinsiya hay owa eun nagakinahangean pa nga magpakita it negatibong resulta it swab test ukon vaccination certificate.
