KALIBO, Aklan—Mas kapin pang ginpabaskog ag ginpatibay it gobyerno probinsyal ro pagsolusyon sa nagapadayon nga pagpanaeasa it coronavirus disease ukon covid-19 sa probinsya it Aklan partikular sa isla it Boracay.
Raya hay sandig sa Executive Order No. 003, series of 2021 nga ginpirmahan ag ginpaguwa ni Aklan Governor Florencio Miraflores.
Ro nasambit nga EO hay ginpaguwa ko Pebrero 2 kon sa siin nakabaehag kara ro ginapatuman nga sueondanan it Department of Health Memorandum No. 2020-0439 angot sa detection, isolation, treatment, reintegration ag strategies para sa COVID-19.
Mag-eowas kara, nakabaehag man ro guidelines nga nagamando sa mga hotel ag LGU nga makaangkon it kaugalingon nga isolation ukon quarantine facility.
Gin-engganyo man it gobyerno probinsyal ro mga employer nga inde pagpaguwaon sa isla ro andang mga workers kon uwa it importanteng nga panaw ag kon makaguwa gidman hay kinahang-ean nga makabalik sa sueod it 12 oras.
Kon inde ro mga raya makabalik eagi hay kinahang-ean nandang mag-quarantine sa isolation facility it hotel sa sueod it pitong adlaw kon sa siin sanda igamonitor ag pagaobserbahan it health and safety officer it establisyemento.
Ro nasambit nga polisiya hay para eamang sa mga worker it accommodation establishments ukon mga hotel, resorts ag inns ag bukon it kaibahan kara ro mga Aklanon workers nga naga-inulan adlaw-adlaw ukon kada dominggo.
Base sa pinakaulihing datos maghalin sa Aklan Provincial Epidemiology Surveillance Unit it Aklan Provincial Health Office, ro nasambit nga probinsya hay nakalista eon it kabilugang 623 nga kaso it Covid-19 kon sa siin 42 pa ro mga aktibong kaso ag 21 ro namatay.
