KALIBO, Aklan–Masako eon ro Aklan Provincial Governement ag Department of Education (DepEd) sa pagpahaum it mga kinahang-eanon para sa nagahilapit nga paghost it probinsya it Western Visayas Regional Athletic Association (WVRAA) Meet 2023 nga maga-umpisa sa Abril 26 hasta 30.
Raya hay matapos kumpirmahan it DepEd-VI ro opisyal nga paghost it Aklan sa nasambit nga regional sporting events.
Suno kay Governor Jose Enrique Miraflores nga nagkaistorya eon sanda it Provincial School Board it DepEd-Aklan agud nga maistoryahan ro mga pagpahaum, pagbantay ag seguridad nga igapatuman sa kabilugan it pahampang.
Aminado ro gobernador nga maabu pang dapat ayuson partikular sa venues, billeting quarters ag ro pagpurchase it iba pang sports equipment.
Dapat sigon nga maging presentable ro tanan agud nga maipakita sa bilog nga rehiyon nga sarang it Aklan nga magbuyot it mabahoe nga sporting event apisar nga haeos daywang buean eon lang ro nabilin para sa preparasyon.
