KALIBO, Aklan—Nagaplano makaron ro provincial government it Aklan nga mag utang it haeos tunga sa bilyong peso sa Land Bank of the Philippines.
Suno kay Aklan 2nd district sangguniang panlalawigan member Jay Tejada, chairperson it committee on budget, ways and means nga tuyo it paga-utangon nga P445,300,000 milyon pesos nga magastusan ro mga nagkaeain-eain nga mga development projects.
Ro pinakamabahoe sigon nga pondo hay maagto sa proposed construction it multi storey parking building it provincial hospital nga naga-abot sa masobra sa P300 milyon pesos samtang ro nabilin hay pagabak-eon it construction and maintenance equipments ag pag ayos it farm to market road ag tulay partikular sa Brgy. Dalagsaan, Libacao sa idaeum it Philippine Rural Development Program.
Ginpahayag dugang ni Tejada nga ro urgent request ni governor Joen Miraflores nga makaangkon it utang sa landbank hay maga-agi pa sa review and evaluation ukon maid-id nga pagtuon it provincial board kun sa siin nakataeana raya nga pagapamatian ag pagahimayon it committee of the whole sa masunod nga mga inadlaw.
Ro mga proyekto nga pagagastusan hay naeakip sa annual investment program it probinsiya para makaron nga dag-on.
