KALIBO, Aklan–Nagpaabot it pagkasubo ag pakikisimpatiya ro Aklan Provincial Government para sa naaywan nga pamilya ni Makato Mayor Atty. Abencio Torres pinaagi sa sangka resolution.
Suno kay Aklan Vice Governor Atty. Reynaldo “Boy” Quimpo nga ginkakibot nanda ro gulping pagtaliwan ni Mayor Torres bangud owa nanda raya nakitaan it senyales it pagpang-euya.
Ulihi sigon nana raya nga nakaibahan ko tyempo it kampanya ag mabaskog pa.
Eubus sigon ro andang pagkanugon sa pagkamatay it sambilog sa progresibo ag respitado nga alkalde sa probinsya.
Ginpabugae pa kara nga owa naeakot sa anumang kontrobersiya si Mayor Torres sa anang tatlong termino nga pagserbisyo sa pumueoyo it Makato.
Maabu man suno kana nga manami nga legasiya si Mayor Torres.
Base sigon sa nakaabot kana nga impormasyon, inatake it stroke ukon heart attack ro alkalde kung siin makataliwan ro pilang oras hay binawian it hueam nga kabuhi.
Matueopangdan nga sa nagtaliwan nga eleksyon hay nagdaeagan imaw sa pagka bise alkalde kung siin, nagdaog imaw nga may kabilugan nga boto nga 9,089 kontra kay Boby Clyde Legaspi nga nakabuoe it 8, 953.
Samtang, plano sigon nanda nga itao ro nasambit nga resolution sa pamilya Torres makaron nga dominggo.
