KALIBO, Aklan—Nagpatabang eon ro provincial government sa National Bureau of Investigation (NBI) agud nga tumuron ag pasabton ro mga tawo nga sa likod it pag-isyu it peke nga reverse transcription polymerase chain reaction ukon RT-PCR test sa mga turistang gustong magbakasyon sa isla it Boracay.
Suno kay Aklan Provincial Administrator Selwyn Ibarreta, mabahoe ro andang pagduda nga posibleng may sindikato sa likod it pagpameke bangud nga kaabuan sa mga nabobo-oe nanda nga pekeng COVID-19 test result hay halin sa sangka mabahoe nga ospital sa Metro Manila.
Ginpahayag dugang nga maka-alarma ro sunud-sunod nga pagka-aresto sa mga turista sa Boracay nga nagagamit it pekeng COVID-19 test results kun sa siin pila sa mga raya hay nagpositibo sa deadly virus sa ginpatigayon nga swab tests.
Sa makaron suno kana hay owa eon sanda nagabaton it probationary nga QR code agud nga matapna ro nasambit nga kalakaran.
Ginahueat gid anay sigon nanda makaron ro validation it andang Covid-19 certificates halin sa accredited nga laboratory center.
Samtang, ginpahayag pa ni Atty. Ibarreta nga pagatalakayon man nanda ro nasambit nga isyu sa nakataeanang meeting it inter-agency task force.
Ro mga nadakpan suno kana nga mga turistang nag peke it andang RT-PCR tests hay ginpahilway matapos nag-negatibo sa swab tests apang ginhawiran ro mga nag positibo para sa 14-day quarantine.
Sa pihak kara, ginpasakaan sanda tanan it nagakaigo nga kaso sa Aklan prosecutors office.
