Plano makaron it Aklan provincial government nga mabutangan it cruise ship port sa Brgy. Caticlan, Malay.
Raya suno kay Mr. Nieven Maquirang, executive assistant to the office of the governor ro andang nakit-an nga long term plan nga posibleng matabo engkaso nga mapondohan it mabahoe nga kantidad it gobyerno ro planong proyekto.
Ginpaathag nga engkasong makaangkon it cruise ship port hay madugangan ro livelihood ag maabong produkto ro maipresentar sa mga turista.
Sa kamatuoran suno kana hay ro isla it Boracay eamang ro uwa it port para sa mga high end nga barko kon sa siin ro iba nga mga tourist destination kaparehas sa rehiyon it Ilocos hay ginaumpisahan eon ro kaparehas kara nga proyekto.
Una kara, nagdungka ro MV Seabourn Encore sakay ro kapin sa 512 nga pasahero nga ginakaeakipan it European tourist ag mga crew kon sa siin 75 porsyento sa nasambit nga numero ro nagpanaog sa Boracay.
Nag-island hopping ro mga raya, nagkaon sa mga restaurants ag nagpamakae it mga souvenirs.
Kinahang-ean suno kay Maquirang ro nasambit nga proyekto agud nga mapasanyog pa gid ro industriya it turismo sa nasambit nga isla.
Matapos ro haeos tatlong dag-on nga pakikipagsukoe sa pandemya hay nakabalik eon ro ibang mga negosyo sa isla kon sa siin nagaabot eon sa makaron sa 166 Department of Tourism (DOT) Accredited Accomodition Establishment ro may una sa isla nga pwedeng madayunan temporaryo it mga bisita.
