KALIBO, Aklan–Iga-lobby it provincial government it Aklan sa Inter-Agency Task Force (IATF) nga maeakip sa prayoridad it gobyerno nga mabakunahan kontra COVID-19 ro mga tourism workers sa isla it Boracay.
Suno kay Aklan Gov. Florencio Miraflores, ro pagpabakuna sa mga trabahador sa isla hay importanteng tikang agud nga magtaas pa ro kumpiyansa it mga turistang mag-agto sa Boracay.
Dugang pa kara nga presente sandang nakikipag-istorya sa Department of Tourism sa pag-angkon it travel bubble agud nga makabalik eon makaron nga dag-on ro mga turistang halin sa South Korea ag China.
Apang, nakadepende gihapon raya sa ginapatuman nga travel protocols it Pilipinas ag nasambit nga mga nasyon.
Ginpamilit pa ni Miraflores nga maskin nga maka-alarma ro pagtaas it numero it mga kaso it COVID-19 sa Metro Manila, hugut sa gihapon nanda nga ginapatuman ro protocols, eabi eon ro pag-obliga sa mga turistang magpakita it negatibong resulta it andang reverse transcription-polymerase chain reaction (RT-PCR) test.
Nauna eon nga gin-aprubahan it Boracay IATF ro paggamit it saliva RT-PCR testing para sa mga turistang magasueod sa Boracay.
