KALIBO, Aklan—Mainit nga gin-abi-abi it provincial government ro mga delegado maghalin sa bilog nga isla it Panay sa ginpatigayon nga Western Visayas Regional Athletic Association ukon WVRAA Meet 2023 sa Calangcang Sports Complex sa banwa it Makato.
Suno kay Aklan governor Joen Miraflores nga timely gid ro nasambit nga regional sporting events sa selebrasyon it ika-67th founding anniversary it Aklan.
Sa raya nga pamaagi sigon hay maishowcase ro mga nagkaeain-eain nga hampang sa probinsya.
Engkaso suno kana nga mataw-an it kahigayunan nga maging host ro Aklan sa palarong pambansa hay indi sigon nanda raya pagbalibaran ag siguruhon nga mataw-an it nagakaigong pondo para sa mga improvements it mga playing venues.
Samtang sa pihak nga parte, ginpahayag mat-a ni Aklan vice governor Atty. Reynaldo Quimpo nga ro WVRAA hay kahigayunan para sa mga atleta nga maipakita ro andang kinaiya sa mga pagapasakupan nga sporting events.
Panugyan nana sa tanan nga ipakita ro pagiging sportsmanship, i-enjoy ro hampang ag bilog nga pwersang ipakita ro mga natun-an sa training maghalin sa andang tagsa-tagsa ka eskwelahan bangud nga bitbit nanda ro pangaean it andang probinsyang ginhalinan.
Ginpasiguro man nana ro suporta it gobyerno probinsyal hasta sa matapos ro regional meet iya sa probinsya it Aklan.
