KALIBO, Aklan—Ginatinguhaan makaron it Provincial Health Office (PHO)-Aklan nga makontrol ro sitwasyon it Coronavirus Disease 2019 ukon COVID-19 sa probinsya it Aklan.
Suno kay Dr. Leslie Ann Luces it PHO-Aklan nga dapat maging haum ro mga pasilidad nga paggamiton engkaso nga magtaas pa ro numero it mga dinapuan it deadly virus.
Kinahang-ean sigon maging haum ro mga ospital ag quarantine facility nga pagabutangan it mga pasyente.
Nasayuran nga humampak eon sa kabilugang 1,420 ro kumpirmadong kaso it sakit sa Aklan.
Raya hay matapos nga makalista it 9 nga panibag-ong nagpositibo nga ginakaeakipan it 7 maghalin sa banwa it Ibajay ag tig sambilog nga kaso sa Kalibo ag Malay.
Sa pihak kara, may 18 man nga nagdugang sa listahan it mga nagmayad rason nga sumaka eon sa 1,239 ro total recoveries.
Samtang, nagapabilin sa 35 ro numero it mga namatay bangud sa makamaeatay nga sakit.
Sa makaron, 146 pa ro nabilin nga aktibong kaso nga ginakaeakipan it 126 nga naka-facility quarantined, 14 nga admitted sa Aklan Provincial Hospital ag 6 nga naka-home quarantined.
