KALIBO, Aklan—Nagpatigayon it meeting ro Aklan Provincial Inter-Agency Task Force for Covid-19 nga ginpangunahan ni Governor Florencio Miraflores.
Raya hay may kaangtanan sa mga dugang nga tikang nga pagahimuon it task force agud nga mapasanyog pa gid ro implementasyon it health and safety protocols sa bilog nga probinsya it Aklan.
Kasunod raya sa nagatinaas nga kaso it mga tinamaan it deadly virus kon sa siin ko nagtaliwan nga daywang adlaw hay umabot sa haeos 144 ro nailista it Aklan Provincial Epidemiology Surveillance Unit it Provincial Health Office nga ginakaeakipan it pitong indibidwal nga binawian it hueam nga kinabuhi.
Ginkasugtanan man sa nasambit nga hinun-anon it mga municipal mayors, municipal health officers ag iba pang ahensya it gobyerno nga pabaskugon ag hugton pa gid ro implementasyon it community quarantine kon sa siin ro Aklan hay nagapabilin sa Modified General Community Quarantine ukon MGCQ.
Gindiskusyunan man it mga natungdan nga opisyales ro paglimita sa hueag it mga vulnerable groups, operations it mga establishments ag travel guidelines sa mga ginakabig nga high risk municipalities kamana man ro protocols para sa mga returning Aklanon residents.
Sa makaron hay ginakabig nga high risk municipalities ro Altavas, Balete, Ibajay, Lezo, Kalibo ag Malay samtang una sa moderate risks ro banwa it Malinao, New Washington ag Numancia.
Samtang, nakataeana nga magpaguwa it Executive Order si Gov. Miraflores para sa mga specific guidelines nga igaimplementar sa bilog nga probinsya it Aklan.
