KALIBO, Aklan–Ginpabugae it Aklan Provincial Tourism Office nga naging madinaeag-on ro andang pagpartisipar sa 18th Fiestas in the City nga ginhiwat sa SM city sa siyudad it Iloilo ko Mayo 26, 2022.
Suno kay Aklan Provincial Tourism Officer Roselle Quimpo-Ruiz, raya hay sangka dag-unan nga aktibidad nga ginapangunahan it Department Of Tourism kabulig ro SM city, mga probinsya ag highly urbanized city sa bilog nga Western Visayas.
Ginkalipay man kara ro uman nga pagbalik it aktibidad matapos ro daywang dag-on nga pagpaiway tuga it pandemya.
Ro aktibidad hay ginatawag man sigon nga “travel fair” kung siin may booth nga ginataeana sa kada probinsya nga pwedeng butangan it brochure ag iba pang promotional materials.
Samtang, nagprepara man sigon sanda it pilang ka mga aktibidad kapareho it fashion show para i-showcase ro ginapabugae nga piña ag abaca products kamana man ro pilang delicacies halin sa mga kabanwahanan.
