KALIBO, Aklan—Padayun nga ginasunod it provincial government it Aklan ro direktiba it national government angot sa pagbaton sa mga Locally Stranded Individuals ukon LSIs ag Returning Overseas Filipinos ukon ROFs.
Suno kay provincial administrator Atty. Selwyn Ibarreta, ro mga LSIs hay dayun nanda nga ginaturn-over sa andang natungdan nga local government units sa pag-akomodar kanda sa andang ligtas covid center ukon LCC.
Ro mga LGU’s sigon ro nagasueang sa mga raya sa Caticlan jetty port sa oras nga makadungka ro andang ginasakyan nga roro vessel maghalin sa Batangas port.
Maabu sigon nga numero it mga LSI’s ro naga-aeabutan makaron sa Aklan halin sa nagkaeain-eain nga parte it nasyon eabi eon sa Metro Manila nga na-stranded matapos nga ginpatuman ro lockdown tuga it Coronavirus Disease ukon Covid-19.
Suno kay Atty. Ibarreta nga sa idaeum it patakaran it National IATF, kinahangean nga may bitbit ro mga LSIs nga medical certification nga gintau it LGU nga andang ginhalinan ag indi eon kinahangean ro certificate of acceptance halin sa LGU nga magabaton kanda.
Sa oras nga ipaidaeum sa strict home quarantine, kinahangean nga tapuson nanda ro daywang domingo nga quarantine agud nga maprotektahan ro andang pamilya ag komunidad partikular ro mga naghalin sa mga ginakabig nga high-risk identified areas sa nasyon.
Sa pihak nga parte, mas hugut ro mga requirements nga kinahangean para sa mga returning OFW’s.
Dapat nga negatibo ro andang resulta sa real-time polymerase chain reaction ukon RT-PCR test halin sa Manila antes sanda nga pagapasugtan nga maka-uli.
Pag-abot sa Kalibo hay gina-housing anay sanda sa Aklan training center ukon iba pang isolation centers it provincial government sa sueod it daywang adlaw antes nga igatugyan sa andang natungdan nga LGU’s nga magadaea kanda sa andang kanya-kanya nga mga baeay para sa strict home quarantine.
Dapat nga ma-monitor sanda it husto ag masiguro nga indi magguwa sa andang baeay samtang ginahueat ro resulta it ikaywang RT-PCR test nga ginpatigayon it mga taga-Provincial Health Office.
