Ginaengganyo it Aklan Pullers Club ro mga kabataan ag estudyante sa probinsya nga testingan ro arm wrestling bilang alternatibong aktibidad ag pamaagi para mapa-umwad ro andang talento ag interes sa sports.
Suno sa founder it grupo nga si Angelo Luces, nag-umpisa ro grupo bilang Aklan Red Arm Commandos nga may ap-at nga miyembro antes gin re-brand bilang Aklan Pullers Club.
Halin sa pag-ensayo sa mga pampublikong lugar ag covered court, nageawig ro grupo ag nakapatigayo eon it regular nga training sa nagkaeain-eain nga lugar sa Kalibo.
Kaabuan sa mga miyembro makaron hay mga estudyante, samtang gaabot eon man sigon sa 100 ro kabilugan nga numero it miyembro it grupo halin sa nagkaeain-eain nga parte it Aklan.
Suno pa kana sambilog sa nagapangunang tuyo it grupo ro mataw-an it positibong ueubrahon ro mga kabataan, kapin eon ro mga may interes sa sports, ag mag-angkon sanda it outlet para sa stress ag iba pang personal nga gina-agyan.
Ginpamilit man it grupo ro importansya it kaeuwasan sa arm wrestling, partikular ro tamang positioning ag technique agud malikawan ro injury.
Mageuwas sa pag-ensayo, tuyo man it grupo nga maka-partisipar sa mga lokal ag pambansang kompetisyon ag mabuligan ro mga atletang may potensyal nga maka-kompetensya sa mas mataas nga lebel.
