Bukas si Aklan second district board member Jay Tejada sa mga surcharges bangud nga sa maskin anong transaksyon sa gobyerno ukon pribado hay may ginaimponer nga surcharge.
Apang, raya sigon ro unang kahigayunan nga may ginaduso nga surcharge sa public utilities partikular sa power supply.
Angot kara, gusto sigon nana nga maklaruhan kon anu ro connection ag kon inde baea makadugang sa paeas-anon it mga member-consumer it Aklan Electric Cooperative ukon Akelco ro 2 percent nga surcharge ag ro ginaimponer pa gid nga disconnection fee sa mga inde makabayad it andang electric bill sa eksaktong oras.
Apang sa pihak kara, ginarespeto nana ro ginkasugtanan sa ginpatigayon nga Annual General Membership Assembly ukon AGMA.
Hueaton eon lang suno kana ro desisyon nga igapaguwa it Energy Regulatory Commission ukon ERC matapos nga nakapasaka eon it resolution ro Akelco base man sa nakasugtanan it mga konsumidor.
