Hugot ro panindugan ni Aklan second district board member Jay Tejada nga pag-oponer sa uman nga pagbuhi sa 19th congress sa ginaduso nga Boracay Island Development Authority government-owned and control- corporation ukon BIDA GOCC.
Suno kana, klaro raya nga pag-eapas sa laye nga nakabaehag sa 1987 Philippine Constitution kon siin ginaboe-an it otomiya ag awtoridad ro lokal nga gobyerno it banwa it Malay ag Nabas.
Raya eon sigon ro tyempo nga maghugpong ag magtingob ro mga matag-as nga opisyal it probinsya it Aklan agud nga pamaeabagan ro uman nga pagbuhi sa BIDA bill bangud nga harap-harapan raya nga pag-insulto sa kinamatarong ag poder it LGU’s it probinsya.
Kabay suno kay Tejada nga sa administrasyon ni pangueong Ferdinand Marcos Jr. hay mabasura eon ro nasambit nga hagna bangud sa nasambit kara nga pag-abolish sa mga ahensya it gobyerno nga may kapareho nga trabaho ag responsibilidad.
Ro mga tinawo kara hay dugang eamang nga paeas-anon sa paswelduhan it gobyerno.
Samtang sa pihak nga parte, plano makaron ni Tejada nga iduso ro sangka resolusyon nga nagadeklara bilang persona non grata sa mga proponent it nasambit nga hagna bangud nga uwa sanda it kinamatarong nga magtungtong sa ginapabugae it Aklan nga isla it Boracay.
Raya bilang kaparte it andang sentimyento bangud sa kawad-an it respeto sa mga nagadumaea ag nagapamuno it probinsya.
