KALIBO, Aklan—Nakatutok makaron ro programa it Sangguniang Kabataan ukon SK Federation sa probinsya it Aklan sa mga tikang nga may kaangtanan sa pag-kontrol sa padayun nga pagtinaas it kaso it teenage pregnancy ukon ro mga pamatan-on nga nagakanabdos sa batang edad.
Suno kay Marianne Inawasan, Public Information Officer (PIO) it Aklan Sk Federation nga makaalarma sa gihapon ro padayun nga pagtinaas it datos nga nailista it Population Commission.
Sambilog man raya sa mga sitwasyon nga nagapabug-at sa ekonomiya it nasyon.
Base sa datos it United Nations Population Fund, masobra sa P33 bilyon ro pwedeng maduea sa kita it mga pamilyang Pilipino kamana man sa ekonomiya it nasyon kung ro nagadumaea sa sangka panimaeay hay ro menor de edad.
Apang suno sa PopCom, bukon it basehan nga kung timprano magnabdos ro sangka indibidwal hay maging pabug-at raya sa komunidad.
Kamatuoran kara, ginduso it ahensiya sa Kongreso ro “Teen Pregnancy Prevention Law” nga magabulig sa mga batang ina nga makaangkon it manami nga bwasdamlag.
Suno pa sa PopCom, importante man nga sa elementarya pa eamang hay ginturo eun ro reproductive health education agud may masayuran ro pamatan-on may kaangtanan sa pagnabdos ag pag-umpisa it pamilya.
Importante man sigon ro suporta it gobyerno sa mga batang ina agud mataw-an sanda it tyempo nga maging produktibong indibidwal.
Nasayuran nga una eun nga nagpaabot it pagkabaeaka ro nagkaeain eain nga ahensiya it gobyerno bangud sa pagtaas it mga kaso it teenage pregnancy sa tunga it ginapangatubang nga COVID-19 pandemic.
Samtang nakatutok man makarun ro programa it Provincial Health Office ukon PHO-Aklan sa mga program ag kampanya agud malikawan ro pagtinaas it mga kaso it nagapakamatay sa probinsya it Aklan.
Suno kay Kate Meňez Provincial Adolescence Coordinator it PHO -Aklan nga makarun hay ginapataw-an nanda it mabahoe nga atensiyon sa mga barangay health worker sa tanan nga mga barangay ro paghatod it mental health program nga makabulig sa pamatan-on agud indi makapag-isip nga maghimo it andang ikasamad.
Mag-euwas kara, padayun man ro andang ginhimo nga tikang agud mapabilin nga euwas ro publiko sa peag it coronavirus disease 2019 ukon covid 19 pandemic.
