Kalibo Aklan —–Sa pihak it sigidas nga kampanya it mga health authorities kaangot sa kon paano malikawan ro makamaeatay nga virus nga nagadaea it sakit nga 2019 coronavirus disease ukon COVID-19, uman nga nadugangan ro mga kumpirmadong kaso it mga natamaan it nasambitang sakit sa probinsya it Aklan.
Base sa pinakaulihing datos halin sa Department of Health (DOH) Western Visayas, ro pang an-om nga kasong nailista sa Aklan hay ro sangka 40-anyos nga eaeaki nga taga banwa it Kalibo.
Sa official statement nga ginpaguwa it Provincial Health Office (PHO-Aklan), ro pasyente hay may travel history sa Manila ko March 14, 2020 kon sa siin nakaangkon raya it ubo ko March 23, 2020 apang uwa it konsultasyon sa doktor nga natabo.
Ko March 30, 2020 hay nagpakonsulta sigon raya sa Aklan Provincial Hospital apang ginrefer sa out patient department kon sa siin gintaw-an it medikasyon nga antibiotics sa sueod it pitong adlaw ag ginkabig nga Person Under Investigation (PUI).
Nakabaehag dugang sa statement it PHO nga ginboe-an raya it specimen sample ag ginpaeksamin.
Kadungan kara, ginpaidaeom imaw sa strict home quarantine kon sa siin gin manduan man it ahensya ro Rural Health Unit it Kalibo ag Barangay Health Emergency Response Team ukon BHERT nga maid-id nga imonitor ro kondisyon it pasyente.
Kahapon, Marso 5 hay nagguwa ro confirmatory result it pasyente halin sa Western Visayas Medical Center kon sa siin nagpositibo raya sa virus nga SARS-CoV-2 nga nagadaea it COVID-19.
Sa makaron ro Kalibo hay nakalista eon it tatlong kaso it sakit samtang tig sambilog mat-a ro mga banwa it Libacao, Malay ag Altavas.
