KALIBO, Aklan—Una eon sa Alert Level 2 ro klasipikasyon it probinsiya it Aklan bangud sa padayun nga pagnaba it COVID-19 cases.
Suno kay Dr. Cornelio Bong Cuatchon Jr. it Provincial Health Office ukon PHO-Aklan nga ro positivity rate makaron hay 4% matapos nga daywa eamang ro nagpositibo sa 50 nga samples nga ginpaidaeum sa RT-PCR tests.
Raya hay naghalin sa banwa it Tangalan ag Malay.
Gindugang pa ni Dr. Cuatchon nga mag-eowas nga negative eon ro 2-week growth rate hay low eon man ro ADAR ukon average daily attack rate.
Sa idaeum it bag-ong alert level system, pagapasugtan ro indoor dining sa 50 porsiyento sa Level 2, apang para eamang sa mga fully vaccinated nga customer.
Pag-abot man sa outdoor dining ag iba pang mga outdoor na establisyimento, 70 ro venue capacity sa Level 2, anuman ro vaccination status it customer.
Angot kara, padayun nga nagapadumdum si dr cuatchon sa publiko nga indi masyadong magpakampante sa padayun nga pagnaba it mga kaso, eabi pa ag nagapabilin ro paeag it mas makataeapon nga delta variant.
