KALIBO, Aklan—Ginkumpirma it Provincial Health Office ukon PHO-Aklan nga una eon sa “low risk classification” ro probinsiya base sa mga datos ag trend it COVID-19.
Suno kay Dr. Cornelio Bong Cuatchon it PHO-aklan nga nabutang sa low risk ro aklan bangud sa padayun nga pagnaba it mga bag-ong kaso sa nagtaliwan nga daywang domingo nga negative 54% kamana man nga nagnaba ro ADAR ukon average daily attack rate nga less than one.
Kasunod kara, nagnaba man ro health care utilization rate nga below 10.
Mabahoe man ro pagpati ni Dr. Cuatchon nga posibleng mabutang sa modified general community quarantine ukon MGCQ sa nobyembre 1 bangud nga haeos 6 nga domingo eon nga sunud-sunod ro manabang kaso it COVID-19.
Sa makaron hay nakalista it daywang bag-ong kaso ag 24 ro nag-negatibo sa kabilugan nga 26 nga ginpaidaeum sa RT-PCR test ukon 7.6% nga positivity rate.
Nakalista man it zero active cases ro banwa it Libacao, Balete ag Nabas.
Sa makaron hay nakalista eon lang it 76 nga aktibong kaso, 61 ro naka facility quarantine, 6 ro naka home quarantine ag 9 ro admitted sa ospital.
Nakabulig it mabahoe suno kana ro pagdeklara it probinsiya sa MECQ kun sa siin may mga travel restrictions.
Sa pihak kara, nag-apela ro PHO nga indi maging kampante ag magsunod gihapon sa mga ginapatuman nga health and safety protocols ag magpabakuna bangud nga nagapabilin pa ro paeag it deadly virus.
Samtang, nagahueat pa sanda it guidelines halin sa DOH central office sa pagpa-rehistro sa mga menor de edad ukon 12 hasta 17 anyos nga gustong magpabakuna.
