KALIBO, Aklan—Una sa “high risk” classification sa pandemya ro bilog nga probinsiya it aklan base sa report it Covid-19 risk indicator it Department of Health (DOH) Center for Health Development.
Suno kay Dr. Cornelio Cuatchon Jr. it Provincial Health Office ukon PHO-Aklan nga ginabutang sa “high risk classification” ro aklan matapos nga makitaan it pagtaas it kaso it COVID-19 ko nagtaliwan nga mga inadlaw.
Ginbasehan sigon kara ro pagtaas it anang two-week growth ag average daily attack rate per 100,000 population.
Umpisa Hunyo 7 hasta hunyo 20, nakalista ro aklan it kabilugan nga 977 nga kaso it deadly virus.
Sa sueod suno kana it sang domingo hasta daywang domingo hay nakalista sigon it 999 nga kaso ukon may case difference nga 2.25%.
Bangud kara, kinahangean suno kana nga mas pang mapabaskog ro Prevent, Detect, Isolate, Treat, ag Reintegrate ukon PDITR strategies.
Nagpaandam pa si Dr. Cuatchon nga engkaso nga maga-deret-deretso ro pagtinaas it kaso kada adlaw hasta sa Hulyo 31 hay mabahoe ro posiblidad nga magasaka ro quarantine status it probinsiya sa MECQ ukon modified enchanced community quarantine.
Base man sa community quarantine decision matrix, ro banwa it Buruanga hay nabutang sa critical risk samtang ro Banga, Kalibo, Malinao, Nabas, New Washington ag Tangalan hay sa high risk.
Pitong banwa it naeakip sa moderate risk nga ginaeakipan it Numancia, Malay, Makato, Lezo, Ibajay, Altavas ag Balete samtang ro low risk Batan, Libacao ag Madalag.
