KALIBO, Aklan—Naangkon it 14 anyos nga runner ro kauna-unahang bueawan nga medalya para sa probinsiya it Aklan sa sporting events nga 100-meter dash sa nagapadayun nga 2019 Batang Pinoy National Championships sa Puerto Princesa, Palawan.
Suno kay Coach Jovie Ote, ginbansagan nga “fastest man” ro atletang si Marc Anthony Daroy, residente it Barangay Polo, New Washington, Aklan ag grade 10 student it National Comprehensive High School sa nasambit nga banwa.
Si Daroy suno kana ro pinakamaisot nga atletang sumabak sa 100-meter dash apang napierde kara ro defending gold medalist nga si Justin Angelo Muñoz it Pangasinan nga naging silver medalist eon lang samtang bronze medalist man ro pambato it Pasig City nga si John Dave Magtangob.
Nauna kara, ro nasambit nga “smallest runner” hay una sa ika-limang pwesto kato sa 100-meter dash record sa Visayas Qualifying Leg nga ginpatigayon sa Iloilo City ko February 24 hasta March 3, 2019.
Nasayuran nga ro Batang Pinoy hay sangka national sports development program para sa mga pamatan-on nga ginapangunahan it Philippine Sports Commission (PSC).
