Naka-angkon it kahigayunan ro atleta nga maghalin sa Madalag, Aklan nga maipakita ro anang kapasidad sa patag it boxing sa paeaabuton nga Palarong Pambansa nga pagahiwaton sa Ilocos Norte.
Suno kay Davey Al Zaballero, coach it nasambit nga atleta, sa ap’at nanang gina training nga manughampang, tatlo kara ro nakabuoe it bronze medal ag nagaisaeahanon eamang rayang si Ryan Salvio, grade 8 student nga maghalin sa Ma. Cristina Integrated School ro nakaangkon it bueawang medalya. Nakuhit sigon ni Ryan ro bueawang medalya kontra sa Ilo-ilo pinaagi sa first round knock out.
Dugang pa ni Davey nga naging manami andang eksperyensya sa nagtuhaw nga WVRAA meet 2025 bangud manami ro andang naging preparasyon ag ginpahauman gid nanda ro nasambit nga kompetisyon. Nakita man sigon nanda ro dedikasyon it mga atleta bukon eamang sa boxing kundi sa tanan sports nga itaguyod ro pangaean it probinsya sa mga sporting events.
Paathag man ni Davey nga naging malipayon sanda ag may sangkiri nga pagkaemosyunal sa pagka-daog it bueawang medalya bangud nagbalik sigon kana tanan kat naga umpisa pa eamang ro anang atleta hasta sa naangkon na eon ro ginahamdum nga bueawag medalya.
Sa makaron, naga-amat-amat eon sigon sanda magpahaum para sa maabot nga Palarong Pambansa ag sa masunod nga dominggo hay pagaumpisahan eon nanda ro proper training.
Dugang pa ni Davey nga uwa sanda it problema sa pinansyal nga estado bangud sa bulig it probinsya ag DepEd, may mga allowance nga ginatao kanda para sa training.
Mensahe man nana sa mga gustong maging boxer nga indi pagdaya-on ro sarili pag-abot sa training ag mag pamati gid sa trainer ag coach bangud sanda ro nakasyod kun ano pa ro dapat iimproba.
