KALIBO, Aklan—Kaisog it boot ag mabaskog nga pagsalig sa kaugalingon ro naging yabe it mga Aklanon players agud makakuhit it maabong medalya sa ginpatigayon nga virtual competition it hampang nga Pencak Silat kung sa siin ro host country hay Indonesia.
Suno kay Coach Freddie Jizmundo Sr, nga mag-euwas sa mga mapagsik nga players hay mabahoe man ro naging papel it mga trainor nga ginakabig nga warrior.
Ginapahayag dugang nga sa makarun hay matunog eun ro probinsya it Aklan pag-abot sa nasambitan nga hampang, sa kamatuoran kara hay insigida sandang ginarekomenda engkasong may “on the spot” nga hampang.
Sa kabilugan it kompetistyon, nagapangaywa ro Pilipinas sa mga nasyon nga nakabo-oe it maabong medalya ag nagapangatlo sa overall rating it kada teams.
Kaabuan sa mga gold medal hay maghalin sa Aklan.
Nasayuran nga ro mga participating teams hay ginakaeakipan it Australia, Netherland, Thailand, Japan, Indonesia, India, Kazakhstan ag Brunei nga may kabilugang 73 teams.
Samtang sa pihak nga parte, ginkalipay man it sambilog sa mga Aklanon athlete nga si Jaidan Coching ro anang pagkadaog it daywang ka mga gold medals.
Suno kana nga raya ro pinakaunang kahigayunan nga naangkon nana ro ginahamdon nga bueawang medalya sa international nga kompetisyon.
Nagpaabot man raya it pagpasaeamat sa anang coach nga si Freddie Jizmundo Sr. ag sa anang supportive parents nga una sa likod it anang kadaeag-an.
Samtang, bangud sa pagpamantaw sa training it anang magueang nagdesisyon man ro 8 anyos nga si Daniela Coching nga magpasakop sa training it Pencak Silat.
Nakabo-oe man raya it silver medal.
Nasayuran nga ro daywang magmaeanghod hay una eun nga naging awardee it Batang Pinoy.
