KALIBO, Aklan–Kapin sa syento porsyento eon nga preparado ro mga atleta it Aklan nga magasabak sa nagahilapit nga Western Visayas Regional Athletic Association ukon WVRAA Meet 2023 nga magaumpisa sa Abril 26-30, 2023.
Suno kay Victor Supetran, division sports training and development officer, una eon sanda sa 90 porsyento sa andang inhouse training nga nag-umpisa ko Abril 9 ag haeos plantsado eon man ro tanan para sa mabahoe nga sporting events.
Uwa man gid sigon sanda it naencounter nga problema ag maayos man ro andang billeting quarters sa Numancia Integrated School.
Sa mga nabilin nga inadlaw antes ro WVRAA proper competition hay nagapadayon pa ro andang training ag pagpabaskog sa mga atleta nga magasabak sa nagkaeain-eain nga klase it hampang.
Angot kara, nag-apela si Supetran sa mga Aklanon nga suportahan ro tanan nga atleta agud nga makahampang it husto hasta sa matapos ro mga sporting events.
