KALIBO, Aklan—Padayun makaron ro paghimo it pangaean it sangka Aklanon car racer.
Raya hay matapos nga magpasakop sa Palawan International Circuit race si Joshua David Marquez kung siin nagtapos imaw bilang 4th-runner up.
Suno kay Joshua naging hangkat kana ro sangkiri nga oras it preparasyon bangud nag-abot imaw sa area daywang adlaw antes ro kompetisyon.
Aminado si Joshua nga kinahang-ean ro bastante nga training para masiguro ro kahauman sa podium.
Sa edad nga pitong dag-on hay may kasayuran eon imaw sa pagmaneho it go kart kamana man nga nag-umpisa eon imaw nga magpasakop sa mga racing tournament.
Sa kamatuoran suno kana hay nagapadayun ro anang pagpahaum para sa 2nd round it ROTAX MAX Challenge Philippines Series nga pagahiwaton sa maabot nga Hunyo 19 sa bahin it Clark International Speedway.
Suno kay Joshua mabahoe ro naibulig it pagsuporta it anang ama para mas pa imaw nga makaangkon it interes sa nasambit nga sports.
Raya sigon ro unang nagpati ag nagturo kana para ipadayun ro anang passion.
Sa pihak nga parte, indi man maitago it ama ni Joshua nga si Jess Marquez ro kasadya para sa achievemet it anang unga.
Ginpasiguro man kara ro bilog nana nga suporta kaibahan ro anang bilog nga pamilya sa mga paeaabuton pa nga kompetisyon it anang unga.
Importante sigon nga masayuran it sangka ginikanan ro sports nga gusto it andang mga unga para mataw-an it nagakaigo nga motibasyon ag suporta.
Daywang dag-on pa eamang sigon si Joshua hay nakitaan eon nana raya it interes sa mga saeakyan ag racing rason nga imaw ro nagtueod kana para raya hay mataw-an it katumanan.
