KALIBO, Aklan—Una eon sa eowas nga kahimtangan ro sangka Aklanon caregiver kaibahan ro anang daywang ka mga employer matapos nga marescue sa kasagsagan it gyera sa tunga it militanteng grupong Hamas ag Israeli defense forces.
Suno kay Bombo International Correspondent Kirsten Haresco, personal nana nga nasaksikan ro makangiedlis nga hitabo bangud nga maeapit mismo sanda sa war zone.
Maskin delikado hay ginbalikan nana ro anang daywang ka mga magueang nga employer kon sa siin adlaw it Lunes hay narescue eon sanda sa sueod it panimaeay ag naibakwit sa mas eowas nga lugar.
Ginpahayag dugang nga makaeoeooy ro mga tawo nga uwa it habas nga ginpamatay, ro mga propyedad nga nagkaeasamad kaeakip ro mga edipisyo, mga nagkaeain-eain nga klase it saeakyan ag mga panimaeay.
Haeos kada minuto hay nagaalarm ro andang mga gadget kadungan it mga pagsabog ag eopok nga andang nababatian ag naeksperyensyahan sa lugar.
Uwa eon sigon it supply it kuryente ag tubi sa lugar nga andang ginhalinan ag makabig eon makaron nga ghost town.
